الاربعاء 5,32 مساء بالكفي تحت بيتنا 

عوض وجبر الله لي قادم وقريبا  ثقه بالله..

انا بانتظارعوض الله لي 

العوض اللي راح يخلي قلبي يطير من الفرحه 

العوض والجبر اللي بيخليني اقول الله واخيرا انا سعيده ومرتاحه البال 

اخيرا انا بصحه وعافيه وشبابي وقوتي ورزقي كله عندي 

اخيرا كل احلامي صارت حقيقه وعوضني الله فيها ..

الله لو ادري ان هالعوض بهالجمال كان صبرت اكثر واكثر ومااستعجلت 

مجرد اكتب وعشت شعور الفرح ودمعت عيني كيف لو كان واقع يااااه 

اشهدني عليه يارب 

 اليوم الاربعاء الساعه 5:8 مساء 

4/11/1444

وانا طفله كنت احزن من قصص المسلسلات والافلام واقول لنفسي هل هذي حقيقه هل فيه كذا 

واتأثر منهم وكبرت وانا اتابع هالمسلسلات اول بأول ولما وصلت لعمري الان 33

طرت ببالي ان اطرح قصتي على مخرج او كاتب, طالما قبل فكرت بتأليف كتاب عني لكن لم تنجح الفكره.

حياتي تنفع لمسلسل اوفلم قصه حقيقيه, انا فقط بانتظار النهايه المفرحه والجميله لقصتي ثم اقدمها 

لان ماعانيته ليس بالسهل من احداث مؤلمه وعظيمه وفخرانا اراها فخر لي 

وكنت اتمنى وقتها الناس تعرفني وتعرف وش عانيت وتشوف وش كثر انا انسانه عظيمه وقويه وشجاعه 

الاربعاء 3_5_2023

6 مساء 

الشوق لنفسي..

اشعر بالبرد يعصف بجسدي اشعر بفراغ داخلي مع الايام يكبراشعر بضياع وبتعب وكأنني وحيده في هذا العالم من شدة شوقي لنفسي ابكي لساعات عليها.لااعلم اين امشي ولا اين طريقي ولا الوجهه 

احيانا اتمنى لو اصرخ واصرخ الى ان ترتاح نفسي دموعي كل ليله كانت شاهده علي,احتاج لراحة البال والهدوء والامان احتاجها كثيرا.

من طفولتي الى الان ماقدرت ارتاح كل سنه تمراقول اللى بعدها افضل وانتظر السنه تنتهي حتى تبدا الجديده واحصل على مبتغاي الجميل لكن تمر السنين نفس بعض.

بعد الثانوي اعتقدت ان حصولي على الجامعه رح يريحني ويفتح لي الابواب اكتشفت انها بدايه التعب والالم والهموم 

كانت دراستي الجامعيه صعبه دخلت قسم غير مرغوب كثيرا ولم يكن هدفي 

كان هدفي التمريض واجتهدت وحصلت على نسبه بالثانوي عشان اقدر ادخل لعل الظروف اقوى مني اجبرتني 

لدخول قسمي الانجليزي كنت كل يوم اتمنى لو افصل منه لكن الله ساعدني وتخرجت 

اعتقدت الوظيفه تنتظرني مثل صديقاتي تخرجو وتوظفوا وظايف حكوميه وبهذاك الوقت كان التوظيف سهل لكن لم يحالفني الحظ

توظفت بروضه اطفال خاصه ماعندي خيار ثاني هذا الموجود عملت فيها لاربع سنوات كان فيه الترسيم 

لكن تخطاني وحصلو عليه البنات معي بالعمل ولم احصل عليه لاسباب غير واضحه

فصلت منها بسبب الحرب اخر سنه بالدوام حصلت حرب بمنطقتنا الحوثيين علينا بالسعوديه كنت اداوم والقذايف قدامي تنرمى 

كنت اقول لنفسي لعل هذا الاجتهاد والتعب احصل على العوض مثلا كترسيم!

والعوض كان الفصل من الدوام لان الوضع غير امن وفصلت .

عشت 4 سنين تحت القصف كسعوديين تضررنا من الحرب نفسيا وكل شي اتعبتني جدا 

بسنه 2019 مرضت ودخلت بدوامه المرض ورم بالرئه اه ياكبر الهم , ولعل هالامر ارهقني اكثر 

من عمر العشرين الى عمر ال32 الان  لم اجد يوما جميلا ولم اجد الراحه ولازلت متمسكه بالحياه لاني احبها 

مؤمنه ان نصيبي من الفرح والراحه والسعاده والاحلام انني سأحصل عليها لااعلم كيف لكن سأحصل

هذي ماتمر به نفسي , ألايحق لي ان اشتاق لنفسي.؟

 التاريخ 13/10/1444  , 3/5/2023

اليوم: الاربعاء 

الساعه 6 مساء

بدايه جديده..

اليوم قررت ان احذف كتاباتي القديمه وابدا من جديد من اليوم 

لعل الكتابه تنفس عني بعض مابخاطري وفقدي للامل بالحياه ولما تتقفل كل الابواب بوجهي مازالت الكتابه تخليني اطلع كل مادفن بالعمق , مرات بكتب بالفصحى ومرات بالعاميه المهم اكتب واعبر عن نفسي بملجأي الدافي..

                                                        شكرا يارب 💓

شكرا لك يارب على وقفاتك معي 

شكرا على لطفك فيني 

شكرا على رحمتك بي وبقلبي 

وووالله اني عاجزه على شكرك 

واحاول قد ماقدر اتقرب منك , يارب اعني وساعدني.

وقفت معي في اصعب ظروف مرت بي وظرف مارح انساه بحياتي 

كيف حسيت باامانك ولطفك يحيط بي من كل مكان كان شعور عظيم اول مره احس فيه..

الحمدلله والشكرعلى كل نعمه كانت او هي كائنه..

                                             

                                                                     أحبك ربي وسامحني على تقصيري 💓